杜拜世界盃賽日，各場賽事檔位抽籤儀式剛啱直播，而草地1800米一級賽杜拜草地大賽，突然見到有支香港旗仔，仲抽到個2檔添，唔通有香港賽駒去中東比賽無人講？
非也，其實呢匹參賽杜拜草地大賽馬仔，屬崔氏家族名下嘅愛爾蘭賽駒「仙幻之王」(My Oberon)。2021年6月嘅英國雅士谷賽期，佢就有份參加威爾斯親王錦標，結果跑獲殿軍，表現都算唔差。因為馬主嘅關係，所以「仙幻之王」會代表香港參賽。
講到崔氏家族，喺歐洲馬壇都有一定地位。崔寶榮先生於1993年憑馬女「海都市」贏過法國凱旋門大賽。後來「海都市」生咗匹神馬「海都之星」，2009由崔家亮再捧凱旋門冠軍。早排喺香港就有匹「海都巨星」，但來港後未贏過就退役。
至於今次去杜拜嘅「仙幻之王」，出自父系「杜拜威」，外公就係「海都之星」。據悉佢哋已經卜定由剛啱結婚嘅馬昆主策，睇下馬昆可唔可以將新婚之喜，帶旺埋「仙幻之王」。總之星期六晚，就齊齊為香港代表以及馬昆打氣啦！
