星期日凌晨00時30將會上演總獎金達1200萬美元嘅杜拜世界盃，呢場泥地2000米賽事吸引到唔少美國星級賽駒參加，包括現時全球評分最高馬匹「暢快活」。雖然佢從未跑過2000米，亦係首次出國比賽，但依然畀唔少海外博彩公司睇好，將佢列為1.7至2.1倍大熱門。
現時世界評分高達124嘅「暢快活」，出道以來跑7場取6冠1亞，當中以最近2場最為出色。先喺上年贏得育馬者盃泥地一哩大賽，最近就贏泥地1800米一級賽飛馬世界盃。呢匹泥地王係超級快放馬，一出閘就放到對手甩轆嗰隻。而佢評分咁高，皆因喺飛馬世界盃輕勝3個幾馬位，完勝上任排名最高馬匹Knicks Go。
由杰士馬主團隊(China Horse Club)以及WinStar Farm共同擁有，4歲嘅「暢快活」今次就首度跑2000米，主策騎師奧天信就話路程無問題。而最正係今次抽到個1檔，對於呢匹快放馬可謂如虎添翼。
講開奧天信，查實「暢快活」頭4次出賽都係由56歲嘅史文夫策騎，點知去年8月28日喺一級賽艾倫傑肯斯紀念賽中，以頸位輸畀Jackie’s Warrior之後，就換由奧天信主理，亦都再無輸過。
