'

三項數據支持 工業國度強配爭G1

喺日本都幾受歡迎嘅澳洲騎師連達文,星期日佢就會騎「工業國度」爭奪NHK一哩賽(草地1600米一級賽)。表面睇落「工業國度」賽績唔算特別標青,但3歲馬賽事有時都要鬥吓進度,加上呢匹馬都有利好數據支持,若果有分頭更值得捧場。

自2015年起,7匹NHK一哩賽盟主竟然無一係新勝馬。就算嚟香港贏香港一哩錦標嘅「頌讚火星」,捧NHK一哩賽之前都只係跑第4名。而「工業國度」剛啱跑草地2000米G2彌生賞以第5名過終點,正正符合上述數據。

另外自2016年至今,6屆NHK一哩賽有4次都外籍騎師贏得,杜滿萊以及李慕華或贏2次。至於澳洲騎師的話,2011年都有韋紀力憑「大賽波士」勝出。所以今次名牌馬主周日競馬團體搵得連達文騎「工業國度」,相信會有一定機會。

提到周日競馬團體,近幾年於NHK一哩賽成績都唔錯,曾於2016、2017及2021捧盃,比如「太空隕石」以及上屆「速度大師」。再講,「工業國度」2次跑東京競馬場非冠即亞,睇嚟左轉闊場兼長直路,啱晒佢發揮。