【説好世盃故事】最固執主帥 森保一一戰封神 撫慰多哈悲劇幽魂 日本球迷集體道歉

日本奇跡逆轉,2:1反勝3屆世界冠軍德國。好多日本球迷賽後向領隊森保一道歉,並多謝佢帶來一個永世難忘嘅晚上。呢位我行我素領隊,亦為自己及日本足球,撫平「多哈悲劇」的哀傷。

29年前,1993年,卡塔爾首都多哈舉行亞洲區世界盃外圍賽,日本最後一戰,只要擊敗伊拉克,即可首度打入決賽周。三浦知良、中山雅史先後入波,去到補時仍領先2:1,全場最後一個攻勢,伊拉克憑角球追和2:2,日本世盃夢碎,Kazu及一眾隊友,難以置信、悲愴的神情,成為日本足球一個時代烙印。

森保一當時係正選中堅,之後佢同日本足球共同努力,國家隊已成為決賽周常客,森桑亦一步一腳印,帶領廣島三箭3奪J League冠軍,2018年7月起任國家隊主帥。

同樣在多哈,森保一逆轉命運,帶領日本隊史上首度擊敗一支世界盃冠軍,除令「多哈悲劇」的哀怨,得以徹底撫平,留下個人永不磨滅的功勛。

但今仗之前,54歲森保一,其實處境非常不妙,壓力超大,換帥呼聲響遍日本足球界。

日本於外圍賽表現麻麻,曾有出局危機,已令球迷對森保一欠缺信心;26人大軍名單公布後,佢挑選波琴前鋒淺野拓磨,唔揀些路迪中鋒古橋亨梧,更惹來口誅筆伐。

淺野拓磨

淺野拓磨因傷,今季冇乜上陣機會,但佢効力廣島三箭時,已經係森保一愛將,為報恩師厚愛,淺野今仗後備登場,拚盡所有,最終射入一個精彩致勝球,為自己同恩師爭番口氣。

清水心跳門神權田修一,唔受日本球迷喜愛,批評森桑冇理由以佢打正選,唔用喺歐洲搵食嘅川島永嗣、丹尼爾舒密特。結果喺奇跡之役,權田修一多次救出德國攻門,成為賽事「最佳的固執」。

權田修一

懶理外界批評,堅持己見,兩名愛將以表現回報,令森保一得到日本球迷集體道歉。一向被彈戰術保守,對德國不停變陣,最後以全攻陣式完成逆轉,堪稱一戰封神。森保一究竟係神機妙算?抑或忽然行運?無論如何,佢同日本隊,已向今季目標口號:打入8強,邁出重要第一步。