【西甲】又贏3蛋 神奇黑馬重返榜首!艾歷加西亞孭飛+超強數據 基羅納創奪冠神蹟不是夢!

今晨西甲獨腳戲,神奇黑馬基羅納主場以3比0大勝艾拉維斯,力壓皇家馬德里,以兩分優勢重返榜首。

上半場23分鐘,被譽為今季西甲最神奇收購嘅烏克蘭國腳杜夫比克,近門一頂入網,揭開大勝序幕;之後輪到中場樸圖建功,基羅納贏到2比0,下半場杜夫比克再射入12碼,輕取艾拉維斯3蛋。

基羅納最厲害之處,係佢哋勝率極高,近9場聯賽8勝1和,更加係目前歐洲5大聯賽中,最高分嘅榜首球隊。基羅納贏波後重返榜首,比排第2嘅皇馬多2分,比第3嘅巴塞隆拿更多9分!上季基羅納只係排西甲第10位,今季搖身一變成為爭標超級黑馬,令唔少人大跌眼鏡。

除咗鋒線核心杜夫比克,防線大將艾歷加西亞,亦係關鍵功臣之一。巴塞前季免轉會費簽入當時效力曼城嘅艾歷,點知撬到呢位西班牙國腳後,又將佢投閒置散,今季更免費將佢借去基羅納,令基羅納成為自己嘅爭標勁敵。

艾歷加西亞

艾歷嚟到基羅納後,成為絕對核心,12場聯賽全部正選,而基羅納嘅戰績為10勝1和1負,唯一一場失利係輸畀皇馬。講番艾歷加西亞喺今場表現,踢足90分鐘、傳球成功率91%,3次過人、3次搶斷、3次解圍,4次爭搶高空波3次勝出,5次地面爭搶全部成功,而以上數據,可以話係艾歷今季嘅基本嘢。

當然,即使已晉身西班牙國腳,但艾歷加西亞其實只得22歲,職業生涯啱啱起飛,預計今夏必然會被巴塞重召,基羅納要完成奪冠童話,今季好可能係極度難得嘅唯一機會。

睇番近4隊開季首17場西甲、獲得44分或以上嘅球隊,有3支可以帶到尾,成為聯賽最終王者,分別係2008/09球季及上季嘅巴塞隆拿,2020/21球季嘅馬體會,而唯一一次失落冠軍嘅,就只有2010/11嘅皇馬。