杜曹被炒，哄動球壇！班主太心急無情？杜曹因拒買C朗種落禍根？無論如何，車路士正式進入新時代，白禮頓領隊格拉咸樸達（Graham Potter）入主，有機會本周末即領兵對富咸。
阿布時代，車仔著名領隊無數，新班主美國商人保利，出手炒杜曹後，冇請普捷天奴、施丹等名牌接手，只係搵教白禮頓嘅樸達過檔，莫非貪佢夠聽話，唔會做頂心衫？
樸達47歲，踢波時代最叻効力修咸頓，一季咁多；敎波履歷，2011-18教瑞典奧斯達辛斯、2018-19敎史雲斯、2019加入白禮頓，頭兩季15、16位，上季第9名，今季初排第4，的確越教越好，但教唔教得掂巨型班？總之車路士已速磅1600萬鎊解約費，令白禮頓願意放人。
今季歐聯第一戰，作客0:1負薩格勒布戴拿模後，車路士即炒杜曹，無視歐聯冠軍功績，引來唔少爭議。新班主太無情？換個角度睇，狂燒1.8億歐元換嚟高列巴尼、古古列拿、韋斯利科芬拿三個後衞，但防線比上季更差；鋒線史達寧拍夏維斯，加多個奧巴美揚，的確難予人十足信心。班主早前曾叫杜曹買C朗，但換來一句「No！」。
有英國球評話，睇車路士比賽好無聊，無聊而有成績，吹你唔脹，無聊而成績差，就係死罪。杜曹前季亦係中途加盟，代替被炒林柏特，換帥後換來歐聯冠軍。領隊生涯，輪迴起伏，命運總無情。
最後，更相信呢個理由，新班主提出買C朗，貪佢有巨星效應，可以省招牌，但杜曹冇詳細解釋，簡單say no就算。保利當時礙於形勢，即使條氣唔順，忍住冇發作，將兵權交畀杜曹，依家開季唔掂，仲唔借傷成毒，郁你咩！杜曹未教車路士前，喺聖日耳門亦因為同班主不和，提前離職。
