【英超】利物浦官宣 施洛6月上任;沙拿表態:盡力爭取錦標!

利物浦132年歷史,確定出現首個荷蘭籍波士。周日英超煞科送別功勳領隊高普後,紅軍周一正式宣布接班人,由飛燕諾教頭施洛成為新帥。佢將於6月正式上任,簽約3年。同一時間,王牌前鋒沙拿亦出po暗示去留。

利物浦周日英超煞科擊敗狼隊,領隊高普正式結束紅軍執教9年生涯。飛燕諾嘅施洛早前已率先自爆會接手利物浦,紅軍周一亦終於官宣。但要留意其職銜係主教練,而非領隊。雙方簽約3年,6月1日正式履新。

據報,利物浦為撬走呢位45歲教頭,要向飛燕諾賠償940萬鎊。而施洛向飛燕諾告別嗰陣話:「我喺飛燕諾曾經歷好多美好時刻,同好多好出色嘅人合作,要決定離開並唔容易。但作為體育從業員,實在好難拒絕成為英超教練、執教世界上最偉大球會之一嘅機會。」

沙拿喺2017年加入高普麾下,火速進步成世界級球星。隨住恩師高普離開,外界亦猜疑沙拿會唔會離隊。不過,法老王周一出post:「我哋知道獎盃就係一切,利物浦下季會盡力爭取錦標!」換言之,即係沙拿唔走喇!