【英超】利物浦又過一關!麥卡里士打轟完美世界波 高普大讚令人瘋狂;數據證明攻守合一!

利物浦周五凌晨英超以3:1力挫錫菲聯後,又再升上榜首,領隊高普大讚射入完美世界波嘅阿歷斯麥卡里士打,係一位令人瘋狂嘅球員,呢位阿根廷國腳中場,真正做到攻守合一,而數據亦證明呢個事實。

雖然比數係3:1,但利物浦今場贏得並非輕鬆,上半場17分鐘,利物浦藉對手門將失誤,大腳省中達雲紐尼斯反彈入網開紀錄後,58分鐘,因巴特利擺烏龍,曾被錫菲聯扳平。戰至77分鐘,麥卡里士打禁區外勁射,轟入龍門左上死角,令紅軍再度領先,完場前加普先錦上添花,穩定3:1勝局。

對於麥卡里士打,高普賽後咁評價呢位從白禮頓加盟嘅阿根廷中場:「佢係一位非常出色嘅球員,上半場畀佢踢6號位,但我知道佢可以再稍微移前一啲,然後佢射入世界波,徹底改變戰局,絕對瘋狂!一位令人瘋狂嘅球員!」

真係瘋狂㗎,數據統計,麥卡里士打今季已經喺英超貢獻4入球5助攻,仲有多項數據位列利物浦隊內最高。當中包括:搶斷次數最多、對手半場傳球次數最多、贏得地面對抗次數最多、高位壓迫搶斷次數最多、製造犯規次數最多;數據說明麥卡里士打有幾重要,佢同遠藤航呢對利物浦中場組合,都屬於紅軍今季最佳收購。

利物浦贏波後,30戰70分回升榜首,多阿仙奴、曼城2及3分,贏晒最後8場就攞冠軍,但紅軍當中有硬仗,除咗今個星期作客曼聯,5月4日主場對熱刺,仲有5月11日作客維拉,呢3場都係爭標關鍵戰。