【歐聯】後備孖寶建奇功!阿仙奴2:2逼和拜仁;耶穌神助攻 托沙救主刷紀錄

拜仁儲埋儲埋,一次過爆發?歐聯8強首回合,阿仙奴主場喺後防連番犯錯下,只能以2:2逼和表現唔錯嘅拜仁慕尼黑,次回合作客安聯球場,阿迪達真係諗吓計先得喎!

阿仙奴今場繼續用433陣式,門將大衛拉耶,兩閘用基維柯、賓韋治,中堅馬加希斯、沙列巴,中場佐真奴、奧迪加特拍迪勤懷斯,前面三叉戟馬天尼利、薩卡同夏維斯。

拜仁單箭頭卡尼,利萊辛尼、基拿比及穆斯亞拿支援,防中賴馬搭哥列斯卡,後防艾方素戴維斯、艾歷迪亞、迪歷特同甘美治,門將紐亞。

拜仁先喺德盃出局,德甲爭標無望,歐聯係呢支德國超級班霸嘅唯一希望。雖然拜仁決心十足、往績亦一面倒佔優,但時移世易,佢哋目前嘅戰力同狀態,似乎都喺阿仙奴之下,只能靠經驗及鬥志搭夠。

阿仙奴一開波主導比賽,踢到11分鐘,賓韋治喺右路助攻,薩卡踏順步韻,禁區內左腳施射收死紐亞,中堅艾歷迪亞眼神防守,兵工廠先開紀錄。16分鐘,賓韋治又助攻,並把握到艾方素戴維斯犯錯,殺入禁區面對紐亞,可惜射得太正被沒收。僅3分鐘後,就輪到阿仙奴嘅馬加希斯交失波,個波落到哥列斯卡腳下,一個靚交,倒戈嘅基拿比把握機會追成1:1。

阿仙奴犯錯後氣勢驟減,拜仁拎番唔少攻勢,去到30分鐘,沙列巴禁區內踢跌利萊辛尼,球證直指12碼點,卡尼主射中鵠,反超2:1,半場亦維持呢個比數返更衣室。

換邊後阿仙奴加強攻力,以辛真高取代基維柯,去到66分鐘,達Sir銳意加強攻力,用加比爾捷西斯、托沙入替馬天尼利及佐真奴,擺大個頭見到奇效,76分鐘,一對後備合作,耶穌仔過兩關後交畀托沙,托沙冷靜射門,將比數改寫成2:2完場。

托沙呢球波除咗幫阿仙奴打下強心針,佢自己亦寫下連續4場歐聯主場都有波入嘅紀錄,成為歐聯改制後,第4位達到呢個成就嘅球員。

阿仙奴全場射門13次,4次中目標,xG為1.22,反而拜仁突擊威脅更大,全場射門8次,2次中目標,xG為2.08。兩軍下周四會喺次回合再決生死,屆時拜仁將會喺主場安聯球場出擊。