【歐國盃】阿爾巴尼亞閃電入波破紀錄;意大利反勝2:1後瘋狂齋傳 教練怒轟冇意義

歐國盃B組首輪,意大利開波23秒就落後,但上半場已極速反勝阿爾巴尼亞2:1,不過換邊後意大利眾將沉迷控制戰局,幾乎被扳平,激到教練史巴列堤紮紮跳。

意大利鋒線有史卡馬卡、費達歷高基艾沙、法迪斯、柏歷堅尼,阿爾巴尼亞亦有車路士前鋒波也。開波23秒,迪馬高掟界外球,點知巴拉美喺巴斯東尼面前搶走個波後射近柱,阿爾巴尼亞先開紀錄,並刷新歐國盃史上最快入球紀錄。

不過意大利好快就反超前,11分鐘,柏歷堅尼傳中,巴斯東尼頂入;5分鐘後,巴列拿喺禁區外射個靚波,戰至16分鐘已極速反勝阿爾巴尼亞。以為就此上演入球騷?錯喇!

上半場意大利領先後仲有啲攻勢,但去到下半場大踢悶波,中場不斷傳球,令唔少球迷叫苦連天。最終如願保持勝局,當中4名球員錄得傳波超過100次,分別係佐真奴(120次)、迪羅倫素(114次)、巴斯東尼(110次)同尼高路巴列拿(105次),歐國盃史上第二次,而上次係上屆西班牙喺分組賽對瑞典。

齋傳戰術,好多人都以為係教練史巴列堤落柯打,但原來唔係,佢賽後怒插球員不思進取:「係,我哋傳波係好好,但都要要求有效果㗎!冇效果而齋傳,有咩意義?阿爾巴尼亞下半場谷咗上前,我哋應該有空位反擊,但班球員反而更保守!」

B組兩大熱門意大利、西班牙同樣旗開得勝,次輪將會對撼。阿爾巴尼亞、克羅地亞同得0分。