【歐國盃】狂失餐士!基沙文做隊長最邪門 法國0:0荷蘭 攜手出線好穩陣

周六凌晨歐國盃D組重頭戲,法國同荷蘭打和0:0,兩隊下半場大放悶彈,麥巴比冇出場,加上基沙文敗家,終結決賽周連續50場有波入紀錄。

麥巴比上仗對奧地利,同對手互撞爆鼻,起初消息話,法國隊堅持要麥總正選上陣,但最終仍先列後備,三前鋒分別係基沙文、奧士文尼迪比利、馬古斯杜林。

上半場大部分時間快上快落,相當好睇,荷蘭初段佔優,「快馬」費林邦開波未夠1分鐘已有近射機會,但被門將邁治蘭救出。法國企穩陣腳佔番主動,製造多個危險門,可惜基沙文錯失兩個近門黃金機會,令雙方只能0:0和上半場。

今屆賽事有個特點,就係凌晨3點嗰場,下半場經常悶到發慌,今場又係咁款,下半場節奏拖慢,小高潮只有基沙文又近門失機,今場第3次;仲有荷蘭中場沙維西蒙斯入波,但隊友越位食詐胡,結果悶和0:0。

基沙文今場錯失3個黃金機會,做咗「敗家隊長」,佢好邪門,做隊長法國未贏過,戰績2和3負。

依家D組荷蘭、法國2戰4分,出線機會極高;奧地利3:1贏波蘭,2戰有3分,下仗對波蘭只要和波,亦有晉級機會,波蘭成為首支肯定出局球隊,最後一輪應該阻唔到法國。

由於出線在望,波蘭實力又弱,相信今場冇出嘅麥巴比可以繼續抖抖,留番16強再搏殺。