'

【世盃錦囊】G組開波 巴西大熱出場 塞爾維亞相同DNA 又有得爆冷?

嚟到分組賽首輪最後一日,大熱門巴西壓軸登場,今次賽事不斷爆大冷,森巴兵團會唔會一出即死?

巴西點解會係大熱?外圍賽表現的確出眾,三線實力的確平均,由龍門艾利臣比加開始,好多位置都有優質球員。

特別中前場,先有卡斯米路、古馬雷斯做防中,尼馬墮後打進攻中場,再埋拉芬夏、安東尼、雲尼斯奧斯祖利亞、加比爾馬天尼利、洛迪高高斯快翼側擊,李察利臣或加比爾捷西斯中路攻堅,的確陣容豪華,點出都係強陣。

4年前分組賽已碰頭,巴西當時贏2:0,但塞爾維亞近兩季大有進步,外圍賽壓倒葡萄牙直接出線,表現極有說服力。

塞爾維亞彈起,主要亦係靠強力鋒線,雖然富咸「米神」阿歷山大米祖域,足踝受傷未必上陣,但仲有盧卡祖域同杜辛華荷域,前者雖然踢唔掂皇馬,惟有轉投費倫天拿,但仍有一定質素。

杜辛華荷域更令人期待,繼艾寧夏蘭特、麥巴比後,最優質年輕中鋒,同前兩人一樣,唔單止識入波,踢法全面,身材體力俱佳,能帶動整體進攻;加埋佢嘅祖雲達斯隊友菲臘高斯迪,仲有阿積士攻擊中場杜辛泰迪治,絕對有力攻入巴西。

講咗咁耐,都係講兩隊前線優點,就算因為首輪賽事,想踢得保守啲,但有相同DNA情況下,最終開出2.5球入球大,都係好合理嘅一件事。

G組另一仗,昨晚已開打,瑞士一如所料,唔凸出但夠穩陣,喺均勢之下,以1:0險勝喀麥隆。父母都係喀麥隆人,之後移居瑞士嘅杜列安保路,把握一次全場少有射門機會,奠定勝局。