'

【世盃錦囊】8強重量級戲碼,英法大戰唔會係悶戰啩

世界盃最後一場8強賽,由英格蘭對法國。真係咁啱得咁橋,今場於香港時間星期日凌晨舉行,返銀行假嘅打工仔女都睇到。以兩隊實力去秤,今場確係「五五波」。法國同英英格蘭都有好多得分點,預期今場入波唔會少,入球中位數2.5球捧「大盤」。(星期日凌晨3點)

無論鍾唔鍾意麥巴比都好,都要承認佢有強大威脅力。剛賽16強對波蘭,其實後者都有嘗試去抵擋麥巴比,但最終都係頂唔住畀佢入兩粒,協助法國晉級到8強。

比起4年前俄羅斯世界盃,覺得今屆麥巴比成熟咗,呢點對法國絕對係件好事。睇過唔少英國媒體,唔少都估英格蘭領隊修夫基,已有針對性部署,減低麥巴比威力。但個人覺得唔係講咁易,起碼今屆世界盃睇唔到,亦令麥巴比暫時以5粒入波於神射手榜領先。唔好忘記法國仲有老而彌堅嘅銀河唯一基奧特,右邊丹比利亦好有侵略性,法國入球能力絕對有保證。

英格蘭今屆三線都好平均,確實係一支爭標分子。全能中場比寧咸演出亮眼,連後衛麥佳亞都踢翻生。而最正係進攻球員瓣數多,有扭得有頂得亦有速度高,16強輕取塞內加爾之時,相信大家都見識過。

感覺上依家英格蘭踢法都好主動,就算面對強敵法國都唔會太過保守,對於入球「大」會有一定推動力。