世界盃32強C組賽事，中美洲球代表墨西哥鬥歐洲波蘭。今場開平手盤，闡明雙方實力好接近。但考慮到讓球主客和方面，波蘭係受讓一方。以波蘭人腳計確實唔差，「讓球客勝」係唔錯嘅選擇。(星期三凌晨零時)
現時波蘭最有名氣球員，當然係前鋒利雲杜夫斯基。而宏觀整支球隊，唔少成員均於歐洲頂級聯賽效力。包括一對祖雲達斯球員，門將施捷斯尼及前鋒米歷。而今季意甲拿玻里表現極佳，中場施連斯基亦應記一功。仲有維拉守衛比拿歷克、羅馬邊路球員沙利斯基。成支波蘭都不乏具質素球員，同墨西哥絕對有得撼。
墨西哥絕大部份球員都於國內聯賽效力，點計水平都差少少。而少數留歐效力就有老大哥安迪斯加達度，但佢已經36歲，於西甲貝迪斯都唔係次次打正選，狀態方面有疑點。若然要數到大球星，墨西哥真係無乜。而香港球迷最熟悉，可能就係有Sam哥之稱嘅門將奧祖亞。整體上墨西哥唔見得好突出，無十足十把握砌低波蘭，故此「讓球客勝」熱熱地都玩得過。
