上屆世界盃季軍比利時，F組最後一輪對克羅地亞，喺非勝不可嘅情況下，黃金一代下半場發揮番應有水準，無奈盧卡古變病獸，錯失多個黃金機會，只能0:0打和，比利時分組賽出局。
單計今仗下半場，比利時表現的確唔曳，但3場分組賽，只有最後45分鐘踢出水準，實在太遲。除咗輸畀摩洛哥，贏加拿大亦係大話夾好彩，出唔到線亦好合理。
正如奇雲迪布尼所講，比利時球員年紀太大。上屆攞完季軍，4年後依然以夏薩特等人為主力，欠缺新陳代謝，依家提早畢業，比利時黃金一代亦已完成歷史任務，要由新一代接班。
賽前F組形勢，克羅地亞、摩洛哥都係4分，比利時3分，加拿大1分，克羅地亞、摩洛哥和都出線。
比利時非勝不可，陣容作4個改變，包括收起冇態嘅夏薩特，用杜沙特、卡拉斯高等快馬上陣，希望速度制勝，但上半場只能同克羅地亞拉成均勢。
下半場比利時出埋盧卡古，展開最後總攻擊，之前兩仗幾低沉嘅奇雲迪布尼，亦終於醒番，發揮出傳球大師風範，帶番生整條進攻線。
但只有45分鐘，要同時間競賽外，盧卡古亦傷癒無耐冇狀態，浪費隊友浪接浪嘅傳送，除射中柱外，末段再浪費3個非常近磅嘅超級黃金機會，就係差一球，比利時始終攞唔到，0:0打和，比利時被淘汰出局。
克羅地亞5分次名出線，下周一晚11時對E組首名。至於首名，則落喺非洲球隊摩洛哥身上，佢哋以2:1挫加拿大，王牌薛耶治亦有士哥。周二晚上11時，佢哋會同E組次名爭入8強。
