爆！爆！爆！世界盃第3日賽事，出現決賽周史上最大冷門之一！球王美斯雖然先開紀錄，但竟然畀亞洲球隊沙特阿拉伯連入兩球，C組首仗以1:2落敗。
阿根廷1990年揭幕戰0:1負喀麥隆，當時已被視為經典冷門，但今仗無疑爆得更大鑊。同組仲有波蘭、墨西哥，依家先輸畀被視為同組最弱嘅沙特，出線危機當然深重。
決賽周前，美斯講明，今屆係佢最後一次世界盃，如果入到決賽，更巧合係佢職業生涯第1000仗，令人無限期待。今仗佢同老拍檔迪馬利亞打邊，支援拿達路馬天尼斯。
開波只有1分鐘，第5次征戰世界盃嘅美斯，已有入波機會，迪馬利亞右路出波，美斯乘混戰離門12碼起腳，但畀沙特門將撲出。
到7分鐘，阿根廷迫得12碼。但呢球真係有爭議，沙特球員被指防守角球時，禁區內攬實對手中堅奧達文迪，所以被判極刑。其實早一日，英格蘭麥佳亞喺同樣情況下，畀伊朗球員攬得仲勁，但球證完全冇表示。
作為一個世界大賽，執法尺度保持一致係常識吧！但無論如何，美斯主射冇甩拖，取得今季決賽周個人首個入球。
沙特先失球後，未有驚多失，反敢谷上前搶攻，雖然欠缺威脅，但防線成功使出越位戰術，令阿根廷上半場共7次被吹越位，美斯21分鐘單刀入波，先因越位食詐胡，拿達路馬天尼斯更食足兩個。
沙特上半場兵行越位險著，有運未有多失，激起反攻信心，下半場一開波即施展快襲，阿根廷防線發緊夢，竟然陣腳大亂，畀沙特喺48及53分鐘，由沙列查維亞、艾達沙尼射入靚波，5分鐘內徹底逆轉，反先2:1。
打完上半場以為執硬嘅阿根廷，勢頭突然畀沙特搶晒，領隊史卡朗尼即時變陣，換走震騰騰嘅熱刺中堅羅美路，換入曼聯利辛度馬天尼斯，出埋曼城祖利安艾華利斯，打多個前鋒。
阿根廷之後壓住沙特狂攻，但據講仍有微傷嘅美斯，明顯冇良好狀態，迪馬利亞亦踢得好沉，攻勢單調欠創造力，最終未能扳平，令世界盃爆出史上最大冷門之一。
阿根廷周日凌晨對墨西哥，實力比沙特更強，若再有差池將陷入絕境。美斯世界盃冠軍夢，永遠崎嶇難行，睇吓球王經今仗熱身後，可唔可以起死回生。
