阿根廷晉級，8強惡戰荷蘭！ 尋晚兩場16強賽事，荷蘭打頭陣以3:1擊敗美國，之後阿根廷以2:1力剋澳洲，今屆世界盃第一場8強戲碼終於出籠，兩雄相遇，有數不完的Talking Point！
迪馬利亞有輕傷在身，阿根廷尋晚將呢位翼鋒收起，美斯稍為墮後一格幫手派牌，等祖利安艾華利斯衝鋒陷陣，不過亦無阻美斯先開紀錄，57分鐘更藉澳洲門將馬菲賴恩派膠，艾華利斯射成2:0，雖然澳洲77分鐘追番粒後狂攻，不過製造混亂居多，加上門將馬天尼斯守住大門，阿根廷最終有驚無險晉級8強。
今場係美斯職業生涯第1000場賽事，取得1個入球，賽後當選MVP。總計美斯嘅世界盃生涯，23場賽事，轟入9球，超越馬納當拿及C朗(8球)，只落後阿根廷士哥王巴迪斯圖達1球。8次當選MVP，亦已超越C朗嘅7次。
不過，阿根廷8強遇上防守超穩嘅荷蘭，仲能唔能夠再過一關？睇番往績，阿根廷歷年來5次喺世界盃對荷蘭，法定時間90分鐘內係未贏過，僅得3和2負。
睇番荷蘭領隊尹戈爾，喺世界盃嘅戰績係8勝3和，同樣係90分鐘不敗，但最有趣嘅係，2014年世界盃4強，正正就係阿根廷喺互射12碼階段勝出，淘汰荷蘭。當年荷蘭教頭係尹戈爾，而美斯亦有份射12碼。
