童話球隊丹麥，上年歐洲國家盃，經歷分組賽艾歷臣幾乎暴斃球場事件，隊友以高昂鬥志，最終打入4強，震撼人心。嚟到世界盃決賽周，童話可以續寫新篇嗎？
丹麥5次參加世界盃，只有1次未能闖入淘汰賽階段，上年歐國盃成為4強後，強勢依然持續，今次外圍賽以隊史最佳成績9勝1負，強勢晉級決賽周。
童話能否續寫，第一關鍵當然係艾歷臣。呢位丹麥隊歷史出賽次數第4多、進球數第5多嘅中場大將，經歷歐國盃險死之刧，以為必會退役，但半年嘅休養與復健後，今年重回球場，甚至喺新球季轉戰曼聯，更成為必然主力，上仗對富咸貢獻入球、助攻各一，以大勇狀態迎接決賽周。
除咗艾歷臣，熱刺中場硬漢賀積查治，效率超高，更加能攻能守，今季英超喺干地麾下大放異彩，佢同艾歷臣一凹一凸，產生美妙化學作用，係32強之中，其中一個最佳中場組合。
由尼斯門將卡斯柏舒米高、AC米蘭隊長中堅卡積亞、西維爾防守中場迪蘭尼組成嘅防線屏障，亦係丹麥爭霸嘅重要根基。不過卡斯柏舒米高今季離開李斯特城之後，狀態有下滑之勢，即管睇吓決賽周會唔會回勇。
有優良中及後場線打好根基，就睇前鋒有冇足夠入球能力。無疑欠星級大將，主力會係西維爾前鋒多爾貝治，另外布魯日嘅安達斯奧臣，喺歐聯分組賽亦嶄露頭角，隨時爆出驚喜。
丹麥分組賽抽喺D組，同組有早前歐國聯嘅手下敗將法國，以及實力明顯較弱嘅澳洲，突尼西亞或者係一個不明朗因素，但以平均實力計，丹麥要晉級16強應無難度，去到淘汰賽，亦必然會係不可忽視嘅黑馬。當然，想晉級之路易走啲，一定要力爭首名，先可以暫避C組首名大熱阿根廷，再行遠多兩步。
